ايه الحل في شباب بيتسرق عمره وهو قاعد طول الوقت خايف وقلقان على حياته ومستقبله !!
ايه الحل في شباب بيتسرق عمره في التفكير في حلول تخرجه من عنق الزجاجه !!
ايه الحل في شباب بتبص لنفسها فجأة بتلاقي شعرها بدأ يبيض وهما في العشرينات !!
ايه الحل في قعدات القهاوي اللي زادت اللي لا منها فايدة ولا نفع لحد
ايه الحل في الفترة اللي بيسموها «عز الشباب» يقضوها في التفكير والخوف والرعب من اللي جاي اللي منعرفش هو ايه ، الفترة اللي المفروض يكونوا فيها بكامل طاقتهم وحماسهم وانتاجيتهم بيقضوها في نوم وهروب من الواقع
ده في منهم بينام ويتمني يصحي بعد 3 أيام علشان يخلص من الوقت ويعدي بسرعة ومعتقدات وافكار وهمية غريبة دخلت دماغهم الله وحده العالم بيها ، وكإن الدنيا هتخضع لأوامر حد والكون كله هيجيلك تحت البطانية يقولك أؤمورني
عايزين نبقى دولة منتجة أزاي والدنيا مقفولة والدماغ مسحولة في مليون مصيبة .. كوارث ، شغل ، جواز ، مستقبل ، تحقيق أحلام
يصحوا الشباب من هنا على مفاجأة سنهم اللي كسر الـ 30 ويادوب هيبدأوا يعرفوا هما عايزين ايه ، في أي دولة بيتم إهدار عُمر الشباب بالشكل ده !!
احنا بسم الله الرحمن الرحيم كدة الشاب عندنا مبيعرفش هو موقعه فين على الخريطة ودوره ايه ولا هو موجود ليه غير بعد الـ 30 وجايز الـ 40 كمان ده لو ربنا اكرمه ومّن عليه والهمه الطريق ، اللي المفروض من سن 15 سنة أساساً يبدأ يحدد أهدافه ويعرف كل ده ، اعتقد إننا خارج أي تصنيفات لحين ما نتحول لدولة منتجة ، و لو عايز تشوف الشباب اللي بجد اتفرج على #sharktank
المشكلة هنا مش في الشخص اللي مش فاهم و بياخد قرار غلط ولا في الشخص اللي فاهم و بياخد قرار صح ، لالا بالعكس ، أحنا عندنا مشكلة بتواجهنا وهي التوقيت الزمني ، أحنا بناخد قرارات في توقيتات غلط بتزود المشاكل أكتر حتى لو القرارات دي صحيحة
تفاصيل التفاصيل لو اتكلمنا فيها والله لا نعمل منها كتب ، يكفي إني لما نزلت فيديو إنك ازاي ممكن تقبض بالدولار في مكانك لقيت حد داخل فاكرني بهزر ولا بضحك على الناس ، هو مش مقتنع ان في شباب غيره ممكن تعمل الف دولار وأكتر بكتير في الشهر وفي مصر كمان اللي 99% من السلع فيها زادت 3 أضعافها بسبب الدولار ، كل الفكرة انك تتعلم حاجة وتبدأ تاخد خطوات حقيقية
أنت خيالك صورلك إن في حاجات كتيرة مستحيل تحصل وبعيدة كل البُعد عن توقعاتك ، بس أنت متعرفش ان في ناس حققت وبتحقق ومحدش يعرف عنها حاجة ، الفكرة هنا في ان حد يقرر يرشدك لطريق تقدر تتعلم منه وتبدأ مشوارك وانت لسة فاكره بيهزر !! طيب خليك في مياه البطيخ
وسع مخك معايا وحاول تفهم قصدي ، المشكلة في الفكر والمعتقدات اللي لازم نغيرهم ، لازم الدولة تتجه للصناعة والزراعة ونسيبنا من بند الأستيراد شوية وتكثفوا كل الحملات التوعوية للمجالات دي ، أحنا أهدرنا حق الفلاح والعامل اللى هما أساس اقتصاد البلد وهما دول البنية التحتية الحقيقية للدولة
هجرب ادخل جوة دماغ الشباب واكلمك بلسانهم ، انت عندك اللي بيسافر وبيدرس وعندك إمكانيات وشغل عالي اوي ، ايه المانع إن اللي اتعلم حاجة يعلمها لغيره ، يعني تعلمني ازاي ابقى شخص منتج ، انا دماغي عطلانة يا سيدي ، علمني ازاي اعمل منتج مثلاً مطلوب محلياً ويغنينا عن المنتجات المستوردة ، يعني عايزك تشغلي دماغي العطلانة دي وتوظفني وانا في ضهرك ، يا تديني فرصة السفر و تسيبني اسافر وانطلق وارجع اقولك انا على الافكار اللي تخلينا منتجين .. هما الشباب بيفكروا كدة ، يعني مثلاً الشاب من دول يقول في نفسه كل الصحراء دي فاضية ومش مُستغلة ، عمار يا مصر
تخيل السيناريو ده في دماغ اغلب الشباب ، هو عايز يبدأ بس معندوش الفكرة ، الكرياتيڤيتي عند الشعب معدومة بنسبة 100% ، يا راجل يا طيب ده حتى الأفلام والمسلسلات والإعلانات أغلبها وإن لم يكن كلها أفكارها مسروقة من برة ، مش عارفين نسرق فكرة مُنتج نصنعه بإيدينا !! ده اسمه كلام برضوا !!
اعملوا مشاريع حق انتفاع للشباب ، حركوهم ، شغلوهم ، استغلوا الطاقة دي قبل ما تُفنى
الله يرحمه الأستاذ العبقري صلاح جودة قالك حتى القلم اللي بنكتب بيه بنستورده من بره !
واحد صديقي كان قالي علشان نحل المشكلة دي من جذورها لازم نغير الشعب ده بشعب تاني خالص تجيبه وتبدأ معاه من الصفر
الكاتب : محمد حسن الشريف
شكراً لمتابعتك لينا